1. Leathanach oibre - Tithíocht do dhaoine aosta in Éirinn

Cónaíonn an chuid is mó de dhaoine aosta na hÉireann ina dtithe féin. Is í an aidhm atá romhainn ná go bhfanfadh 90% de dhaoine os cionn 75 bliain d'aois ina dtithe féin. Tá sé den tábhacht, mar sin, go gcuirfí cabhair ar fáil chun tacaíocht a thabhairt do dhaoine aosta fanacht ina dtithe féin.

Is le daoine aosta a dtithe féin, den chuid is mó. Tá 14,000 tithe do dhaoine aosta faoi stiúr an údaráis áitiúil - is le bardas nó le comhairle chontae na tithe seo.

Cuireann an Rialtas airgead ar fáil chun cabhrú le daoine aire a thabhairt dá dtithe agus caoi a chur orthu, sa chaoi is gur féidir leo leanúint ar aghaidh ag maireachtáil iontu. Mar shampla:

• Deontas do Dheisiúcháin Riachtanacha - cuireann an deontas seo ar chumas daoine deisiúcháin riachtanacha a dhéanamh ina dtithe. Tig le daoine aosta cur isteach ar an deontas seo.
• Deontas do Dhaoine faoi Mhíchumas - tugann an deontas seo cabhair do dhaoine athruithe a dhéanamh i dtithe chun go mbeidh siad oiriúnach do dhaoine faoi mhíchumas.

Tig le daoine aosta cur isteach ar na deontais seo chun a dtithe a athrú. Ar an gcaoi seo beidh na tithe curtha in oiriúint dóibh de réir mar a théann siad in aois. Má bhíonn fadhb ag daoine aosta dul in airde staighre, mar shampla, tig leo deontas a fháil chun seomraí leapa agus leithris a chur thíos staighre.

Tá méadú mór tagtha ar scéimeanna tithíochta deonacha le blianta beaga anuas. Déanann pobal áitiúil cinneadh tithe do dhaoine aosta a thógáil ina gceantar. Cuireann an rialtas 90% de na costais tógála ar fáil. Tá sciath-thithíocht mar chuid den scéim seo. Is é atá i gceist anseo ná scéim tithíochta do dhaoine aosta le seirbhísí agus cúram comhchoiteann san áireamh, mar shampla béilí-ar-rothaí.

Cuirtear béim níos mó ar a leithéid seo:

• Tithe nua a chur ar fáil do dhaoine aosta, a bhfuil cónaí orthu i dtithe nach bhfuil sásúil.
• Spreagadh a thabhairt do dhaoine aosta, a bhfuil cónaí orthu in áiteanna iargúlta, bogadh isteach i mbailte beaga agus i mbailte móra.

Obair i ngrúpaí beaga:

Freagair na ceisteanna seo, le cabhair an ríomhaire nó i gcóipleabhar. Bain úsáid as aon eolas atá bailithe i do cheantar féin mar chabhair duit:

1. Cá gcónaíonn an chuid is mó de na daoine aosta in Éirinn?
2. Cé leis na tithe ar a dtugtar "tithe an údaráis áitiúil"? Cé mhéad teach de chuid an údaráis áitiúil atá ar fáil do dhaoine aosta?
3. Ainmnigh dhá dheontas atá ann chun cabhrú le daoine aosta aire a thabhairt dá dtithe.
4. Cén chaoi ar féidir tithe, a tógadh go speisialta do dhaoine aosta, a fheabhsú?
5. Mínigh, i do fhocail féin, an bhrí atá le "sciath-thithíocht".
6. Cén fáth gur fearr do dhaoine aosta cónaí ina dtithe féin?
7. Munar féidir le daoine aosta cónaí ina dtithe féin an dtig leo cónaí in aon áit eile?